Pagat e deputetëve të Kuvendit të Kosovës janë rritur për mbi 150 euro, bazuar në Ligjin e ri të Pagave. Me koeficient 16.4, deputetët dhe ministrat do të paguhen me nga 1722 euro në muaj, raporton Paparaci.
Sipas ligjit të vjetër, paga bazë e një deputeti vlente 1,547 euro në muaj. Pagën e njëjtë me deputetët do t’i kenë edhe ministrat dhe gjyqtarët e Gjykatës Kushtetuese. Vlera e koeficientit të pagës në sektorin publik do të jetë 105 euro, është bërë e ditur në mbledhjen e Qeverisë të mërkurën. Ligji i Pagave që hyn në fuqi pas pak ditësh rregullon çështjen e pagave për mbi 82 mijë punëtorët e sektorit publik.
Për të llogaritur pagën duhet shumëzuar vlerën e koeficientit me koeficientin. Pra pasi që vlera e koeficientit është 105 euro, zyrtari që ka pagë në koeficient 5 do të marrë pagë 525 euro bazë, pa llogaritur shtesat. Në Ligjin për Paga janë 136 nivele të koeficienteve, me raport prej 2 në 18. Paga më e lartë do të jetë ajo e presidentit me koeficientin 18, apo 1890 euro.