Të qenit bashkëshort i presidentes Vjosa Osmani, Prindon Sadriut po i sjell shumë përfitime e privilegje.
Ish-bashkëpartiakja e Vjosa Osmanit në Listën Guxo, ministrja Donika Gërvalla – Schwarz, ia ka sistemuar asaj të shoqin në një pozitë të përhershme në MPJD, shkruan Demokracia.com.
Prindon Sadriu është emëruar si i përhershëm në pozitën Drejtor i Departamentit për NATO dhe Politika të Sigurisë në Ministrinë e Punëve të Jashtme dhe Diasporës, zyrë kjo që ishte lënë pa asnjë punëtor për muaj të tërë.
Demokracia.com e ka siguruar vendimin e emërimit të Prindon Sadriut në këtë pozitë.
“Prindon Sadriu me gradë Ministër në Ambasadën e Republikës së Kosovës në Shkup, pas përfundimit të mandatit, sistemohet përhershëm në pozitën Drejtor i Departamentit për NATO dhe Politika të Sigurisë në Ministrinë e Punëve të Jashtme dhe Diasporës”, thuhet në vendimin që e ka siguruar Demokracia.com.
Vendimi është marrë më 30 nëntor dhe mban nënshkrimin e sekretarit Behar Isma.
Krejt kjo është bërë duke “shkelur” mbi një koleg të tij, ngase në këtë pozitë rreth 1 muaj më herët ishte emëruar Artan Duraku.
Por, meqë kjo pozitë ngjalli lakminë e bashkëshortit të presidentes Osmani, Duraku e humbi pozitën dhe nuk u ankua fare.
Vendimi për Durakun për pozitën që ia rrëmbeu bashkëshorti i presidentes Osmani, të cilin po ashtu e ka siguruar Demokracia.com, ishte marrë më 20 shtator të këtij viti dhe hynte në fuqi më 1 tetor.
Prindon Sadriu nuk është hera e parë që përfiton në krah të bashkëshortes së tij.
Ndonëse ai i kishte quajtur mediat edhe si “Ndërmarrje e Përbashkët Kriminale”, presidentja Osmani edhe pas kësaj e kishte mbrojtur të shoqin dhe ishte munduar ta arsyetonte.
Presidentja Osmani gjatë kohës u përcoll nga skandalet e vazhdueshme të bashkëshortit të saj.
Demokracia.com kishte zbuluar se Sadriu në të kaluarën i kishte bërë shtetit kërkesë edhe për rimburësimin e shpenzimeve të trajtimit të virusit Covid-19 në vlerë prej 396 euro e 80 centë, të cilat i ishin rimburësuar kundërligjshëm.
Ai e kishte bërë këtë kërkesë më 22 dhjetor 2020 kur Vjosa Osmani ishte U.D. Presidente.
Zotëriu i Parë në këtë kërkesë e kishte njoftuar asokohe Sekretarin e Përgjithshëm edhe për mungesën e një fature në vlerë prej 40 eurosh, të cilën i thoshte se nuk po mund ta gjente, porse ia kishte bashkuar kuponin fiskal.
