Gjykata Supreme e Kosovës ka shpallur të paligjshëm një dispozitë të Udhëzimit Administrativ të Ministrisë së Financave, Punës dhe Transfereve, i cili ua kufizonte të drejtën e kompensimit financiar veteranëve të Ushtrisë Çlirimtare të Kosovës.
Gjykata Supreme ka vlerësuar se ndryshimet dhe plotësimet e fundit ligjore për statusin dhe të drejtat e dëshmorëve, invalidëve, veteranëve dhe pjesëtarëve të UÇK-së kanë krijuar paqartësi në interpretimin e kushteve për përfitimin e kompensimit.
Në bazë të interpretimit të Gjykatës Supreme, ligjdhënësi ka dashur të përjashtojë nga kompensimi vetëm personat e punësuar në institucione që financohen nga buxheti i shtetit apo në ndërmarrje publike, kurse ata që punojnë në sektorin privat vazhdojnë gëzojnë të drejtën e kompensimit në përputhje me kufijtë e përcaktuar ligjorë.
Gjykata Supreme ka theksuar se kërkesa e Ministrisë së Financave, Punës dhe Transfereve për një dokument nga Administrata Tatimore e Kosovës që vërtetonte se veterani “nuk është në marrëdhënie pune” bjen ndesh me rregullimin e ri ligjor dhe nuk mund të përdoret si kriter për kufizimin e së drejtës për përfitim financiar.
