Ismail Dibrani është emëruar Drejtor i Përgjithshëm i Shërbimit Korrektues të Kosovës (ShKK).
“I vlerësuar dhe nderuar me votimin në mbledhjen e sotme të Qeverisë së Republikës së Kosovës për emërimin tim në pozitën e Drejtorit të Përgjithshëm të Shërbimit Korrektues të Kosovës. Jam i vetëdijshëm për sfidat që na presin dhe problemet me të cilat do të ballafaqohemi por së bashku me Kabinetin e Ministres, personelin e Shërbimit Korrektues të Kosovës, përkrahjen e partnerëve tanë dhe në transparencë të plotë me publikun dhe mediat e lira e të pavarura në Republikën e Kosovës do të arrijmë t’i tejkalojmë të gjitha vështirësitë dhe ta zhvillojmë Shërbimin Korrektues të Kosovës”, ka shkruar ai në ‘Facebook”.
Sipas tij, emërimi në pozitën e Drejtorit të Përgjithshëm të Shërbimit Korrektues të Kosovës para se gjithash është përgjegjësi e lartë shtetërore të cilën do të angazhohet ta kryej me ndershmëri dhe përkushtim.
Ndryshe Qeveria e Kosovës ka marrë sot vendim për emërimin e Ismail Dibranit në pozitën e drejtorit të përgjithshëm të Shërbimit Korrektues të Kosovës (ShKK).
Ministri i Punëve të Brendshme, Xhelal Sveçla, tha se Dibrani ka qenë kandidati më i votuar në konkursin e shpallur nga MPB-ja.
Ismail Dibrani do të ketë mandat katërvjeçar si drejtor i burgjeve në Kosovë. Ai që nga prilli i këtij viti ishte ushtrues i detyrës së drejtorit të ShKK-së, ndërsa në herët ka mbajtur pozitën e drejtorit në Burgun e Dubravës.