Partia Demokratike e Kosovës po vazhdon me fushatën duke publikuar disa video nëpër rrjete sociale, e të cilat përmbajnë video kritikuese për qeverinë.
Kryesisht, videot e fundit përmbajnë gjetje nga Raporti i Progresit.
Kryetari i PDK-së, Memli Krasniqi, ka akuzuar qeverinë se mbi 78 milionë euro ua ka dhënë me tenderë miqve
“78 milionë e 560 mijë euro është shuma e tenderëve gjatë 1 viti, të cilën Qeveria dyshohet se ju ka dhënë miqve dhe të afërmve të tyre – përmes procedurave të negociuara, pa prokurim formal, duke e eliminuar konkurrencën”, ka shkruar Krasniqi.
Video të ngjashme ka publikuar edhe gjatë ditëve të kaluara kryetari i PDK-së.
“Në 133 faqe të Komisionit Evropian për Kosovën – 99 herë përmendet fjala korrupsion! Korrupsion institucional, pasurim i zyrtarëve qeveritarë, varfëri qytetare e regres shtetëror!”, thuhej në një tjetër postim.
Në një tjetër postim me video, Krasniqi kritikonte aksidentet në punë.
“349 punëtorë në Kosovë kanë pësuar aksidente në vendin e punës gjatë vitit të fundit – 15 prej të cilëve kanë humbur edhe jetën. Paga të ulëta, çmime të larta, pasiguri e madhe!”, ishte një tjetër postim nga Krasniqi.
E në një tjetër dhënien e kredive.
“Mbi 650 mijë qytetarë të Kosovës, të cilët kanë kredi, krahas rritjes së çmimeve, duhet të përballojnë edhe rritjen e normave të interesit të kredive!
Ky trend me video kishte nisur para katër ditësh, ku kritikohej qeveria për varfërimin dhe skamjen e qytetarëve.
Një mënyrë të tillë me video, e kishte praktikuar edhe VV-ja, por për të sulmuar opozitën.
Por, çfarë thotë Raporti i Progresit për tenderët?
Raporti i fundit i Progresit i Komisionit Evropian për Kosovën paraqet një pasqyrë të zymtë mangësish brenda sistemit të prokurimit publik të vendit. Ndërsa janë vërejtur disa përmirësime, raporti thekson çalimet në transparencë, kapacitet dhe praktikat e prokurimit që ngrenë shqetësime për keqmenaxhimin dhe korrupsionin e mundshëm. Në tregun e prokurimit publik, ndonëse përmenden përmirësime, shqetësimet për transparencën në praktikat e prokurimit janë gjithashtu pjesë e gjetjeve.
Raporti i fundit i Progresit i Komisionit Evropian zbulon se tregu i prokurimit publik të Kosovës pati një rritje të konsiderueshme në vitin 2022. Në krahasim me 5.6 për qind të BPV-së-së në vitin 2021, vlera e tregut u zgjerua në 6.5 për qind të BPV-së.
“Tregu i prokurimit publik të Kosovës u vlerësua në vlerën e 6.5 për qind të BPV-së në vitin 2022, krahasuar me 5.6% të BPV-së në vitin 2021.” – thuhet aty.
Mungesë e transparencës
Raporti thekson një pjesë e konsiderueshme e aktiviteteve të prokurimit publik (21.80 për qind) është kryer përmes procedurave të negociuara pa një proces formal prokurimi dhe tenderimi.
“Një sasi e konsiderueshme e aktiviteteve të prokurimit publik (21.80%) janë kryer përmes procedurës me negocim pa prokurim formal dhe proces tenderimi.” – thuhet aty.
Kontratat me vlerë 78,56 milionë euro, ose 14,05 për qind e totalit, janë nënshkruar në procedurë me negocim pa u publikuar.
“Vlera e kontratave të nënshkruara me procedurë të negociuar pa u publikuar është 78.56 milionë euro ose 14.05%.” – theksohet në raport.
