Kryeministri i Holandës, Mark Rutte, dhe homologu i tij i Luksemburgut, Xavier Bettel, po vizitojnë Kosovën, raporton Ekonomia Online. Ata janë pritur në Aeroportin e Prishtinës, nga kreu i Qeverisë, Albin Kurti.
Kurti të dy kryeministrat do t’i pres në takim edhe në ndërtesën e Qeverisë ku pas takimit do të këtë konferencë për medie.
Kryeministrat do të takohen edhe me presidenten Vjosa Osmani.
Sipas agjendës me krerët e shtetit do të diskutojnë, “mes tjerash, zhvillimet e fundit në rajon dhe luftën në Ukrainë”.
“Vizita do të përfundojë me një bisedë me përfaqësues të OJQ-ve në Kosovë në fushën e lirisë të mediave dhe LGBTIQ+”, thuhet në njoftim.
Ka disa ditë që qeveria e Kosovës, përkatësisht Ministria e Industrisë, Ndërmarrësisë dhe Tregtisë (MINT), ka marrë vendim për shfuqizim të certifikatës biznesore të Klan Kosova sh.p.k. Mbrëmë, ambasadori amerikan, Jeff Hovenier, tha se është duke e përcjellë nga afër këtë zhvillim, duke u shprehur i bindur se veprimtaria e Klan Kosovës do të vazhdojë, e papenguar.
Veç ambasadorit, të shqetësuar janë shprehur edhe shumë kolegë të tij diplomatë të akredituar në vendin tonë, por edhe organizata vendore e ndërkombëtare që merren me lirinë e shprehjes.
