Komisioni Evropian po përgatitet të shkrijë rreth 13 miliardë euro për Hungarinë, në mënyrë që të shmangë veton e kryeministrit hungarez Viktor Orban për ndihmën e BE-së për Ukrainën, gjë që ka të ngjarë të provokojë kritika nga Parlamenti Evropian, raporton Politiko.
Komisioni ka nevojë për mbështetjen unanime të 27 vendeve anëtare për të përditësuar buxhetin afatgjatë të BE-së, i cili përfshin 50 miliardë euro për financimin e Ukrainës.
Ndihma aktuale e BE-së për Kievin skadon në dhjetor dhe marrëveshja e të gjithë anëtarëve është gjithnjë e më urgjente, duke marrë parasysh vendimin e Kongresit të SHBA për të anuluar përkohësisht vazhdimin e financimit ushtarak të Ukrainës, si dhe për shkak të fitores zgjedhore të Robert Ficos në Sllovakia.
Orban ka njoftuar tashmë se Hungaria nuk do të mbështesë financime të mëtejshme për Ukrainën, duke përmendur shqetësimet për anëtarët e pakicës hungareze në atë vend dhe duke kërkuar që Kievi të ndryshojë ligjin për të drejtën e pakicave për të përdorur gjuhët e tyre.
Në fillim të këtij viti, Hungaria miratoi masa për të forcuar pavarësinë e gjyqësorit, një kërkesë e bërë nga Komisioni Evropian për lirimin e pjesës më të madhe të fondeve të kohezionit të vendit, të cilat arrijnë në 22 miliardë euro.
Nëse në Bruksel arrijnë në përfundimin se këto reforma janë të kënaqshme, Budapesti mund të kërkojë lirimin e rreth 13 miliardë eurove dhe vendimi për këtë duhet të dihet në fund të këtij muaji ose në fillim të nëntorit.
