Protesta e djeshme e pjesëtarëve të njësive elitë të Policisë së Kosovës ngjalli shumë reagime.
Reagimet skandaloze të kryeministrit Albin Kurti dhe ministrit Xhelal Svecla, të cilët provuan të manipulojnë me pagat e policëve i indinjuan qytetarët
Këto reagime u cilësuan si fyerje e dinjitetit të policëve, të cilët e mbrojtën tash e 24 vjet sovranitetin e vendit dhe u përballën me rreziqe të panumërta për jetën e tyre.
Por, përderisa Kurti dhe Qeveria e tij ua kthyen shpinën atyre që i quajmë heronjtë e rinj të Republikës, ai nuk kishte bërë kështu gjatë vitit 2022 me ”Mbrojtjen Civile”, grup ky që u cilësua disa muaj më parë nga Qeveria e udhëhequr nga Albin Kurti si terrorist.
Kosova ka shpenzuar afro 800 mijë euro për pjesëtarët serbë të “Mbrojtjes civile”.
Kjo shumë është shpenzuar gjatë vitit 2022, teksa kanë përfituar 129 serbë. Serbët e sistemuar në institucione të Kosovës bazuar në marrëveshjen e Brukselit, po vazhdojnë të paguhen edhe pse nuk shkojnë në punë.
Zyra Kombëtare e Auditimit i ka thënë KosovaPressit muaj më parë se këto pagesa janë kryer në bazë të marrëveshjes së Brukselit të vitit 2013, marrëveshje të cilën Kurti si opozitë kishte premtuar ta shfuqizonte sapo të vinte në pushtet.
“Për vitin 2022, vlera totale e këtyre pagesave ishte 792,955 euro. Të gjithë janë nga ‘Mbrojtja Civile’. Në dy ministri 52 punonjës ishin paguar vetëm për gjysmën e parë të vitit 2022”, u tha nga Zyra e Auditorit.
Përveç “Mbrojtjes Civile”, Qeveria e Kosovës ka shpallur terroriste edhe organizatën “Brigada e Veriut”. /Demokracia.com/
