Policia dhe Prokuroria e Tiranës kanë sekuestruar të gjitha pasuritë e luajtshme dhe të paluajtshme të subjekteve International Medicare shpk. dhe Sante Plus Group, përfshirë spitalin privat në zonën e Zogut të Zi, i cili vlerësohet në vlerë rreth 3 milionë euro.
Sekuestrimi u krye në kuadër të operacionit policor të koduar “Bilanci”, pas hetimeve që zbuluan shkelje të rëndësishme ligjore dhe ekonomike: subjekti nuk kishte deklaruar fitime mbi 1 milion euro për periudhën 2024-2025, shërbimet spitalore kryheshin me produkte të ndaluara, dhe në subjekt punonin shtetas të pasiguruar.
Specialistët e Sektorit për Hetimin e Krimeve Ekonomiko-Financiare, në drejtim të prokurorit të çështjes, ekzekutuan vendimin e Gjykatës së Tiranës më 27 tetor 2025, duke vendosur masën e “Sekuestro konservative” për spitalin dhe duke vijuar hetimet për gjurmimin dhe sekuestrimin e pasurive të tjera të lidhura me veprimtaritë kriminale.
Njoftimi i plotë:
Tiranë/Vijojnë veprime hetimore dhe operacionale, në kuadër të operacionit policor të koduar “Bilanci”.
Sekuestrohet spitali privat në Zog të Zi (objekt me vlerë rreth 3 milionë euro), ku më datë 4 shtator 2025, u zbulua se kryheshin krime ekonomike dhe krime kundër shëndetit.
Në vijim të këtyre veprimeve, specialistët e Sektorit për Hetimin e Krimeve Ekonomiko-Financiare, ditën e sotme, në drejtimin e prokurorit të çështjes, ekzekutuan vendimin e Gjykatës së Tiranës, dhënë më datë 27.10.2025, për vënien e masës “Sekuestro konservative”, për subjektin spital privat, në Zog të Zi, njesia bashkiake Nr. 7, me vlerë rreth 3 milionë euro.
Më datë 04.09.2025, Policia dhe Prokuroria e Tiranës, në kuadër të operacionit “Bilanci”, zbuluan se:
-subjekti nuk kishte deklaruar fitime me vlerë mbi 1 000 000 euro, gjatë periudhës 2024-2025;
-shërbimet spitalore në këtë subjekt kryheshin me produkte të ndaluara për përdorim;
-në këtë subjekt punonin shtetas të pasiguruar.
Në drejtimin e Prokurorisë, vijojnë hetime për të gjurmuar dhe sekuestruar pasuri të tjera që mund të jenë vënë në dispozicion të këtyre veprimtarive kriminale.
Materialet procedurale iu referuan Prokurorisë së Tiranës, për veprime të mëtejshme.
