Marrëveshja ndërkombëtare për financimin e reformës në skemat pensionale është ratifikuar sot në Kuvendin e Kosovës, në tentativën e katërt. Deputetët e shumicës qeverisëse, si dhe dy partitë opozitare: PDK-ja dhe AAK-ja kanë votuar pro ratifikimit të marrëveshjes. LDK-ja ka votuar sërish kundër.
Kuvendi i Kosovës e ka ratifikuar sot marrëveshjen ndërkombëtare për financimin e reformës në skemat pensionale.
Marrëveshja është miratuar me 81 vota të deputetëve të shumicës parlamentare, si dhe të atyre të PDK-së dhe AAK-së.
Lidhja Demokratike e Kosovës ka votuar sërish, për herë të katërt, kundër marrëveshjes ndërkombëtare për marrjen e kredisë në vlerë 47 milionë euro.
Marrëveshja pritet të rregullojë edhe çështjen e njohjes së stazhit 15-vjeçar të punëtorëve të larguar dhunshëm nga puna gjatë viteve të 90-ta.
Mimoza Kusari-Lila, shefe e Grupit Parlamentar të Lëvizjes Vetëvendosje, kishte thënë se miratimi i marrëveshjes për projektin e reformës sociale është “më se i rëndësishëm”.
“Gjithashtu në vlerësimin e Gjykatës Kushtetuese mbi reformimin e sistemit pensional dhe njohjen e stazhit 15 vjeçar të të gjithë atyre që kanë punuar gjatë viteve të 90-ta, që sa më parë të filloi zbatimi i kësaj marrëveshje”, kishte thënë ajo, duke folur për reformën.
Për ratifikimin e marrëveshjeve ndërkombëtare në Kuvendin e Kosovës duhen dy të tretat e votave të deputetëve.
