Kryeministri i Shqipërisë, Edi Rama, ka pasur një konferencë për media bashkë me përfaqësuesin e lartë të BE-së, Joseph Borrell.
Përveç temës së reformave në Shqipëri, pjesa më e madhe e konferencës ka qenë me temë për tensionet e fundit ndërmjet Kosovës e Serbisë.
Kryeministri i Shqipërisë, Edi Rama, përsëriti para Borrellit kërkesën për një konferencë ku Kurti e Vuçiq nuk lejohen të dalin nga takimi pa arritur një marrëveshje.
Unë shpresoj shumë që ideja e një konference të nivelit të lartë, që të sjellim liderët e dy shteteve, liderët e BE-së dhe Amerikës, dhe të mos i lëmë të dalin pa arritur një marrëveshje, ose të ballafaqohen me të gjitha pasojat që do të ishte shumë zhgënjyese për të gjithë”, tha Rama.
Rama foli edhe për lirimin e tre policëve, duke theksuar se tash është koha për vendosjen e qetësisë.
“Më në fund kemi lirimin e tre policëve, dhe tani është koha për de-eskalimin urgjentisht. Po bëhet shumë më shumë urgjent, dhe jemi të angazhuar që të vazhdojmë punën bashkë me juve dhe miqtë tjerë, që të mos lejojmë që kjo situatë të ndikojë keq në rajon. Kemi shumë punë për të bërë, Procesi i Berlinit kemi bërë shumë progres”, deklaroi më tutje kryeministri i Shqipërisë.
Sipas Ramës, cilido zhvillim në Kosovë apo Serbi, ka ndikim në gjithë rajonin. Andaj, ka nevojë për stabilitet e jo dhunë.
“Por në të njëjtën kohë ishte ndihmues të ndajmë opinionet tona për diçka që është shumë shqetësuese, për të cilën ju personalisht po punoni shumë dhe duhet të bëni për stabilitetin rajonal dhe gjithë progresin rajonal. Ne jemi pjesë e rajonit që ka vuajtur shumë në të kaluarën, dhe nuk mund të jetoj me një kthim prapa dhe ku ngjarjet nuk janë të ndara nga njëra-tjetra dhe nuk mund të shikojmë vetëm shtëpinë tonë dhe detyrat tona të shtëpisë pa u shqetësuar. Pasojat nuk mund të jenë vetëm në Kosoëv e Serbi por gjithë rajonin”, tha ai.
Në këtë takim u diskutuan edhe reformat e Shqipërisë në rrugën drejt Bashkimit Evropian.
“Ishte një takim shumë ndihmues për të folur me juve dhe presidenten e Komisionit Evropian dhe Këshillit Evropian. Është inkurajuese të shohim fjalë të mira për atë se çka po bën Shqipëria në proces, dhe në aspektin e reformave. Ne do të vazhdojmë dhe jemi të bindur se do të jemi të gatshëm të jemi gati në kohë për hapat e radhës”, tha Rama.
Edi Rama edhe më herët kishte propozuar organizimin e një konference ku liderët e Kosovës e Serbisë, nuk do të lejohej të dilnin pa arritur marrëveshje.
Rama gjithashtu ka dorëzuar një draft-statut për Asociacionin, që nuk ishte pritur mjaft mirë në Kosovë.
