“Pak. Fatkeqësisht pak”. Kështu u përgjigj ish-kryeministri i Kosovës, Agim Çeku, në pyetjen se a po bën diçka shteti kosovar për ish-krerët e Ushtrisë Çlirimtare të Kosovës, të cilët janë në paraburgim në Hagë, shkruan Insajderi.
“Duhet shumë më shumë”, vlerësoi Çeku, teksa vlerësoi se aspekti financiar i mbështetjes për ish-krerët e UÇK-së, nuk është mjaftueshëm vetiu, dhe duhet të ketë mbështetje në aspektin politik.
“Duhet që më shumë të mbrohet kauza jonë, lufta jonë, lufta jonë e drejtë e cila ka qenë luftë mbrojtëse dhe e pastër. Sepse akuzat janë të rënda, dhe akuzohen për ‘Ndërmarrje të Përbashkët Kriminale’, e cila nuk qëndron fare. Historikisht është shumë e dëmshme, për historinë tonë, për të ardhmen tonë, që të kualifikohet lufta jonë si e tillë, sepse nuk ka qenë e tillë. Këtu thjesht është një përpjekje për të zbehur rolin e UÇK-së. Duhet të jemi të vetëdijshëm që duhet ta mbrojmë kauzën tonë, duke i mbrojtur ata që përballen me këtë akuzë. Shteti duhet të jetë shumë më aktiv që ta rrëzojë këtë akuzë, qoftë në aspektin diplomatik e qoftë në aspektin lobues, kudo, që assesi të mos pajtohemi me një akuzë të tillë”, ka thënë Çeku për T7.
