Ish-kryeministri i Kosovës, Avdullah Hoti, i është kundërpërgjigjur kryeministrit Albin Kurti, sa i përket dërgimit të ligjeve në Gjykatë Kushtetuese.
Kurti në mbledhje të Qeverisë së Kosovës të mërkurën tha se nuk mbahet në mend kur janë dërguar më tepër ligje në Kushtetuese sesa tash. Ai ka thënë se është “synim për të penguar reformën”.
Hoti në një postim në Facebook, ka thënë se ligjet dërgohen në kushtetuese kur ka dyshime se cenohet rendi kushtetues. Hoti ka thënë se ai që ka frikë nga dërgimi i ligjeve në Kushtetuese ka qëllime politike e jo fisnike.
Gjatë ditës së sotme, kryeministri Kurti ka deklaruar se kontestimi i disa ligjeve në Gjykatën Kushtetuese është “përpjekje dëshpëruese për paralizim reformash”.
Ai ka përmendur Ligjin për Këshillin Prokurorial, atë për Zyrtarët Publikë dhe Ligjin për Byronë e konfiskimit të pasurisë së pajustifikueshme, ndër ligjet që ka thënë se “jo për rastësi, bashkë me Ligjin për masat e përkohshme mbrojtëse të furnizimin me produkte themelore për qytetarët, nëpërmjet të cilit parandalohet abuzimi i çmimeve të produkteve bazë, janë dërguar në Gjykatën Kushtetuese nga opozita parlamentare.
