Ambasadori amerikan, Jeff Hovenier sot bashkë me presidenten Vjosa Osmani dhe ambasadorë të shteteve të tjera, kanë bërë homazhe te memoriali i ushtarëve të rënë të NATO-s.
Përmes një shkrimi, Hovenier ka thënë se kujtojnë dhe nderojnë shërbyesit e guximshëm, duke përfshirë këtu edhe dy shefa të urdhrit të Ushtrisë Amerikane.
“Sot iu bashkova presidentes Vjosa Osmani te memoriali për ushtarët e rënë të NATO-s. Ne kujtojmë dhe nderojmë pjesëtarët shërbyes të guximshëm që bënë sakrificën e fundit, duke përfshirë këtu edhe Shefat e Urdhrit të Ushtrisë Amerikane, David Gibbs dhe Kevin Reichert.” –ka thënë ai.
Ndryshe, sot bëhen 25 vjet prej fillimit të sulmeve ajrore të NATO-s, kundër caqeve ushtarake serbe, për të ndalë kështu luftën në Kosovë.
Urdhri ishte dhënë nga presidenti i atëhershëm i Shteteve të Bashkuara të Amerikës, Bill Clinton. Në një fjalim para popullit amerikan, ai kishte konfirmuar se Aleanca Atlantike po fillonte një operacion ushtarak për të ndalë luftën në Kosovë.
“Ne dhe Aleanca e NATO-s kemi bërë të gjitha përpjekjet, me qëllim që të arrinim një zgjidhje paqësore të konfliktit në Kosovë. Por presidenti Millosheviq, i cili në të kaluarën e afërt shkaktoi luftëra të tmerrshme në Kroaci e në Bosnjë, ka vendosur në favor të agresionit në vend se të paqe.” – kishte thënë ai.
