Normalizimi i marrëdhënieve përmes dialogut ndërmjet Kosovës dhe Serbisë me mbështetjen e BE-së do të kontribuojë për paqen dhe stabilitetin në rajonin e Ballkanit Perëndimor, thuhet në ueb faqen e Ministrisë së Punëve të Jashtme të Japonisë.
Japonia, siç thuhet, mirëpret dialogun në nivel liderësh me mbështetjen e BE-së, ndërmjete kryeministrit të Kosovës, Albin Kurti dhe presidentit të Serbisë, Aleksandar Vuçiq, në Bruksel më 27 shkurt, ku të dyja palët ranë dakord që nuk ka nevojë për diskutime të mëtejshme për propozimin e BE-së të titulluar “Marrëveshja për rrugën drejt normalizimit ndërmjet Kosovës dhe Serbisë”.
Shtohet se Japonia pret që Prishtina dhe Beogradi të angazhohen në mënyrë konstruktive në zbatimin e marrëveshjes, transmeton Paparaci.
“Japonia mbështet një Evropë të bashkuar fuqimisht në kuadrin e vlerave thelbësore dhe mbështet përpjekjet reformuese të vendeve të Ballkanit Perëndimor drejt anëtarësimit në BE në kuadër të “Iniciativës së Bashkëpunimit të Ballkanit Perëndimor”. Sipas kësaj nisme, Japonia do të vazhdojë të mbështesin zhvillimin e qëndrueshëm të rajonit të Ballkanit Perëndimor në rrugën e tij evropiane”, thuhet në deklaratën për shtyp të zëdhënëses së MPJ-së japoneze Hikariko Ono.
