Këtë javë votohet ligji i ri i punës në Gjermani

Ligji për imigrimin e punonjësve të kualifikuar pritet të vendoset këtë javë në axhendën e Bundestagut.

Grupet parlamentare të të SPD-së, të Gjelbërve dhe FDP-së kanë rënë dakord për të nisur diskutimet dhe për të bërë ndryshimet e fundit në këtë ligj para se ta kalojnë në miratim.

Një nga ndryshimet kryesore, sipas Deutsche Welle, pritet të jetë lejimi I azilkërkuesve që të qëndrojnë në Gjermani për qëllime pune. Ata duhet të jenë në gjendje që të hyjnë në tregun e punës nëse do të kenë një ofertë pune.

Lehtësirat ligjore që pritet të kalojnë për miratim janë mirëpritur nga sipërmarrja e lirë, që tashmë pret më shumë njerëz për t’I punësuar pasi evitohen kostot dhe burokracitë.

Projektligji u bë publik më datë 29 mars të vitit 2023.  Me ndryshimin e ligjit për imigrimin e fuqisë punëtore të kualifikuar, koalicioni tripartiak në pushtet në Gjermani kërkon të lehtësojë ndjeshëm imigrimin e punëtorëve të kualifikuar. Në të ardhmen, të huajt nga vendet jo anëtare të BE-së mund të shkojnë në Gjermani për të kërkuar punë me një “kartë shansi” bazuar në një sistem pikësh.

Vitet e fundit, drejt Gjermanisë kanë emigruar dhe një numër i madh shqiptarësh të cilët janë bërë pjesë e sistemit mjekësor të këtij vendi por dhe që punojnë me kontrata pune në sektor të ndryshëm.