Në lidhje me mungesën e deputetëve të mazhorancës ka reaguar edhe kryetari i kuvendit, Glauk Konjufca, i cili tha se “qysh po e shoh këtë sjellje të papërgjegjshme të disa deputetëve unë nuk mendoj që kjo legjislaturë e meriton të vazhdojë”.
Një reagim pati edhe Deputetja e Lidhjes Demokratike të Kosovës, Doarsa Kica – Xhelili, ka thënë se ka pasur kuorum për të filluar sot seancën pasi ishin 90 deputetë, por sipas saj, mungonin ata të pushtetit.
Kica – Xhelili përmes një shkrimi në llogarinë e saj në Facebook, ka thënë se rregullorja kërkon që seanca të fillojë kur janë prezentë 61 deputetë.
Postimi i plotë:
Një sqarim për kuorumin sot në Kuvend.
Kuorum për të filluar seanca kishte. Në sallë ishim rreth 90 deputetë. Rregullorja e Kuvendit kërkon që seanca të filloj kur ka kuorum – pra kur jane 61 deputetë prezent.
POR, shumica po kalkulon sa deputetë i kanë ata në sallë, PA opozitën.
Pra, ne kot shkojmë aty, sepse rëndësi ka vetëm 50%-shi i parë (që nuk po arrijnë ta sigurojnë), jo dhe i dyti, dhe e gjithë kjo në kundërshtim me Rregulloren e Kuvendit.
Ndersa,Nënkryetarja e PDK-së, Vlora Çitaku, ka kritikuar mazhorancën, pasi sot nuk arritën që të sigurojnë numrat për t’i miratuar nismat ligjore.
Çitaku tha se një parti që ka fituar mbi 50 për qind të votave dhe dështon në mënyrë të vazhdueshme të sigurojë shumicën në kuvend, shfaq papërgjegjësi të skajshme.
“Puna e parë dhe kryesore e deputetëve është miratimi dhe inicimi i nismave ligjore. Jo hajt pak. Jo deklarimet jashtë rendit të ditës. Jo shoë”, tha Çitaku.