Kryeministri i Kosovës, Albin Kurti po raporton në Kuvend për takimin e fundit në Bruksel të nivelit të lartë të dialogut mes Kosovës dhe Serbisë.
Ai tha se takimi i së hënës kishte dy pika të agjendës, transmeton Paparaci.
E para sipas tij, ishte formalizmi i pranimit të marrëveshjes bazë të propozuar nga BE-ja e të mbështetur Franca, Gjermania, Italia dhe nga ShBA-të, dhe e dyta qe fillimi i diskutimeve për planin e zbatimit të kësaj marrëveshjeje.
Kurti tha se shpeshherë ka keqkuptim sa i përket këto dy dokumenteve. U shpreh se plani i zbatimit duhet të diskutohet dhe negociatat për këtë s’kanë filluar ende.
“Në takim i ofrova BE-së nënshkrimin zyrtar si kryeministër të marrëveshjes bazike, që duhej ta nënshkruante Borrell dhe Vuçiq. Atë e refuzoi Vuçiq në mënyrë kategorike që e bëri publike pas daljes nga takimi”, tha ai në seancë.
“Qëndrimi i Borrellit është se ky dokument nuk do të diskutohet më, ajo është shpallur në ueb-sajtin e BE-së. Të dyja palët janë pajtuar për një pozicion të tillë, por nuk e kanë pranuar ende. Refuzimi për ta nënshkruar nga Serbia është treguar se ata nuk janë pajtuar me përmbajtjen”, theksoi ai.
Gjithashtu, Kurti theksoi se marrëveshja bazë mes Kosovës dhe Serbisë përbën një hap të rëndësishëm mes të dyja shteteve, ajo bazohet në parimin e respektit të integritetit territorial.