Pa Rrotlla ka siguruar ftesën qe i është dërguar deputeteve ku thuhet se seanca e jashtëzakonshme pritet të mbahet me 4 shtator duke filluar nga ora 12:00.
Pika e rendit të ditës është: Debat parlamentar lidhur me dështimin e Qeverisë së Republikës së Kosovës për sigurimin e teksteve shkollore për nxënësit e nivelit të arsimit fillor dhe arsimit të mesëm të ulët për vitin shkollor 2023/2024.
“Të nderuar deputetë, Uroj të jeni mirë dhe që secili nga ju të ketë kaluar si më mirë gjatë këtij pushimi veror! Ashtu siç ju ka njoftuar ditë më parë Kryetari i Grupit Parlamentar përfundimisht është vendosur që të ftojmë bashkërisht me partitë tjera opozitare (LDK dhe AAK) një seancë të jashtëzakonshme për çështjen e teksteve shkollore. Kërkesa është iniciuar nga ana e deputetëve të tri grupeve parlamentare, të cilët janë pjesë e Komisionit për Arsim dhe natyrisht do ta ketë mbështetjen e deputetëve të tjerë të grupeve parlamentare. Është propozuar që të hënën (04 shtator 2023), në ora 12:00, të mbahet seanca e jashtëzakonshme me temën “Debat parlamentar lidhur me dështimin e Qeverisë së Republikës së Kosovës për sigurimin e teksteve shkollore për nxënësit e nivelit të Arsimit fillor dhe Arsimit të Mesëm të Ulët për vitin shkollor 2023/2024”. Siç e dini, edhe pse jemi në pushimin veror mes dy sesioneve, Rregullorja e Kuvendit shprehimisht lejon mundësinë që Kuvendi të mblidhet ndërmjet dy sesioneve vetëm në seancë të jashtëzakonshme. JU LUTEM, nga nesër (29 gusht 2023) deri të enjten e kësaj jave (31 gusht 2023), ejani në zyret e grupit dhe të jepni nënshkrimin tuaj. Deputetët të cilët për arsye objektive nuk mund të vijnë, sikurse në raste të tjera, edhe në këtë rast mund t’ju përgatis një tekst, me të cilin, përmes emailit mund të shprehni vullnetin tuaj për thirrjen e kësaj seance” thuhet ne letrën e dërguar deputeteve opozitar
Seanca vjen pasi deputetët e partive opozitare kanë dorëzuar sot në Kuvend kërkesën për seancë të jashtëzakonshme parlamentare për 4 shtator për siç kanë thënë “dështimin e Qeverisë për të siguruar tekstet shkollore për nxënësit”.
Kërkesa ishte publikuar nga deputetja e Partisë Demokratike të Kosovës, Eliza Hoxha e cila njëherazi është edhe anëtare e Komisionit për Arsim, Shkencë, Teknologji, Inovacion, Kulturë, Rini dhe Sport.
