Ministria e Mjedisit, Planifikimit Hapësinor dhe Infrastrukturës (MMPHI) është gjobitur me 3 mijë euro nga Agjencia për Informim dhe Privatësi (AIP), për mos ofrim të qasjes në dokumente publike.
Më datë 21 korrik 2023 Agjencia për Informim dhe Privatësi kishte marrë vendim në ankesën e kompanisë, përmes të cilit obligonte MMPHI-në që të ofrojë palës dokumentet e kërkuara.
Në arsyetimin e gjobës, Agjencia për Informim dhe Privatësi thotë se edhe pas njoftimit dhe një takimit konsultues me përfaqësues të MMPHI-së, këta të fundit nuk kanë ofruar qasjen.
Po ashtu, MMPHI, sipas vendimit për gjobë, ishte arsyetuar se dokumentet e kërkuara nga kompania, janë marrë edhe nga hetuesia e Policisë së Kosovës dhe ofrimi i qasjes në to, mund të dëmtonte hetimet.
Por AIP kishte kërkuar një sqarim nga Policia e Kosovës në lidhje me këtë pretendim dhe përfaqësuesi i hetimeve në Policinë e Kosovës i ka konfirmuar se ofrimi i dokumentacionit nuk paraqet problem në hetim.
“Duke vlerësuar mosgatishmërinë e institucionit publik që të ofrojë qasjen e kërkuar, sipas vendimit të datës 21 korrik 2023, AIP konsideron që ka shtjerrë të gjitha mundësitë procedurale ligjore për ta bindur institucionin puiblik që ta jetësojë të drejtën e palës ankuese” – thuhet në vendimin e Agjencisë për Informim dhe Privatësi.
Ministria ka afat prej 30 ditëve që ta paguajë gjobën, në të kundërtën vendimi kthehet në titull ekzekutiv dhe ekzekutohet në mënyrë të detyrueshëm nga përmbaruesi privat.
Po ashtu, MMPHI ka të drejt që të paraqesë padi për kundërshtim në gjykatën kompetente, por ushtrimi i padisë nuk e ndalon ekzekutimin e vendimit. /Kallxo.com
