Kryetari i PDK-së, Memli Krasniqi, ka thënë se protesta e sotme “Liria ka emër”, po përcillet drejtpërdrejt nga ish-krerët e UÇK-së nga Haga, teksa ka ftuar qytetarët të duartrokasin dhe brohorasin UÇK, transmeton atvlive.tv.
“Në këto momente janë duke na përcjellu drejt për drejt nga Haga çlirimtarët tanë. Po na përcjellin drejt për drejt Hashim Thaçi, Kadri Veseli, Jakup Krasniqi, Rexhep Selimi e bashkëluftëtarët e tyre, andaj ju ftoj me një duar trokitje që se ka dëgjuar asnjëherë Prishtina, t’ju tregojmë solidaritetin, t’ju tregojmë mbështetjen, t’ju tregojmë se jemi me ta gjithmonë”, tha Krasniqi.
Ai tha se bashkimi popullit rreth një kauze të drejtë është ajo që i duhet më së shumti Kosovës, “sepse kështu siç jemi sot, ja kemi dalë gjithmonë që të mbrojmë të vërtetën dhe ta kërkojmë të drejtën që na takon”.
“Kjo pamje është mesazhi më i qartë dhe i drejtë për drejtë se liria e jonë ka emër dhe se lavdia e Ushtrisë Çlirimtare të Kosovës nuk pakësohet me kalimin e viteve, nuk tjetërsohet me ndryshimin e gjeneratave dhe se çdo gjeneratë e së ardhmes do ta ketë po të njëjtin emocion si gjeneratat e të sotmes sa herë që i thërret tri shkronjat e arta të lirisë sonë UÇK”, tha Krasniqi. /atvlive.tv