Ministri i Arsimit i Francës, Grabriel Attal, njoftoi të hënën për ndalimin e manteleve të gjata në klasë duke nisur nga viti i ri shkollor, duke thënë se këto rroba, që vishen kryesisht nga myslimanët, janë duke e testuar sekularizmin e shkollave të vendit.
Kritikët thonë se mantelet nuk janë asgjë më shumë se paraqitje e modës dhe se ato nuk përbëjnë ndonjë shenjë të hapur të fesë dhe se nuk duhet të ndalohen në klasë sipas një ligji të vitit 2004, raporton agjencia “Associated Press”.
Megjithatë, për ministrin e Arsimit të emëruar rishtazi, këto rroba janë “shkelje ndaj sekularizmit”, parim themeltar për Francën dhe, në disa raste, përpjekje për t’i destabilizuar shkollat.
“Shkollat tona po testohen vazhdimisht. Ne e dimë këtë”- tha ministri francez në një konferencë për gazetarë një javë para fillimit të vitit shkollor. Ai tha se përdorimi i manteleve të gjata është shtuar rishtazi dhe duhet të trajtohet me përgjigje të vendosur për t’u ballafaquar me atë që nganjëherë përbën “shkelje, përpjekje për destabilizim”.
“Duhet të qëndrojmë bashkë. Do të qëndrojmë bashkë. Abaja (lloj manteli) nuk ka vend në shkollë, asgjë më shumë se simbole fetare”- tha ministri Attal, duke iu referuar ligjit të vitit 2004 për ndalimin e shamive të myslimanëve, mbulesave për kokë që përdoren nga çifutët, kryqet e mëdha dhe simbole të tjera të qarta fetare në klasë.
Autoritetet franceze gjithnjë më shumë kanë marrë masa për ta mbrojtur sekularizmin, parim kushtetues që e ka për qëllim garantimin e neutralitetit fetar në një vend multikulturor. Autoritetet kanë frikë se simbolet fetare janë portë drejt radikalizmit islamik, që ka shpërthyer në dhunë në Francë në të kaluarën. Megjithatë, disa myslimanë ndihen të stigmatizuar nga përpjekjet për t’i detyruar ata që t’u përshtaten rregullave. Islami është feja e dytë më e madhe në Francë.
Me një ligj të vitit 2021 kundër atij që zyrtarët i referohen si separatizëm, u synua fuqizimi i mëtejmë i sekularizmit, duke e shtuar në masë të ndjeshme mbikëqyrjen ndaj xhamive, shkollave dhe klubeve të sportit.
