Presidenti i SHBA-së, Donald Trump, tha të hënën se një marrëveshje mbi pronësinë amerikane të TikTok me Kinën “mund” të finalizohet gjatë takimit të tij me Presidentin kinez, Xi Jinping, më vonë këtë javë.
“Mund të ndodhë. Kjo do të jetë një nga gjërat që do të diskutojmë”, u tha Trump gazetarëve në bordin e Air Force One, ndërsa udhëtonte nga Malajzia në Japoni, si pjesë e turneut të tij në Azi, kur ai u pyet nëse planifikon të nënshkruajë marrëveshjen përfundimtare.
Trump tha se mori “një miratim fillestar nga Presidenti Xi” dhe pret miratim të mëtejshëm, por preferon të “presë deri në disa ditë”.
“Do të zhvillojmë një bisedë të shkëlqyer… dhe do të kemi… një transaksion të suksesshëm për të dy vendet”, tha Trump.
Sekretari amerikan i Thesarit, Scott Bessent, tha të dielën se marrëveshja për TikTok u arrit në bisedime me Kinën dhe “që të dy udhëheqësit ta përfundojnë atë transaksion të enjten në Korenë e Jugut”.
Trump do të takohet me Xi të enjten në kuadër të samitit të Bashkëpunimit Ekonomik Azi-Paqësor (APEC) në Korenë e Jugut. Të dy pritet të diskutojnë tarifat, tregtinë, fentanilin, produktet bujqësore amerikane dhe metalet e rralla.
Trump nënshkroi një urdhër ekzekutiv në shtator, duke i lejuar TikTok të operojë në SHBA sipas një strukture të re korporative me investitorë amerikanë, megjithëse detaje specifike mbeten të pazbuluara.
Një ndalim i aplikacionit në SHBA ishte planifikuar të hynte në fuqi më 20 janar, por u zgjat katër herë nga Trump ndërsa administrata e tij arriti një marrëveshje për transferimin e pronësisë.
