Nga; Gjeneral Hisen Berisha
(Me ndarjen nga jeta të Shenjtërisë së Tij, bota humbi një figurë të rrallë të paqes, mëshirës dhe frymës së vërtetë të dashurisë ungjillore)
I lindur si Jorge Mario Bergoglio në Buenos Aires të Argjentinës, ai ishte i pari Papë nga Amerika Latine dhe i pari jezuit në fronin e Shën Pjetrit. Që nga dita e parë, ai e ndryshoi paradigmën e papatit – duke zgjedhur thjeshtësinë në vend të formalizmit, përulësinë në vend të autoritetit absolut, dhe mbi të gjitha, afërsinë me njerëzit në vend të largësisë hierarkike.
Largimi i tij nga kjo botë shënon fundin e një rrugëtimi jetësor që la gjurmë të pashlyeshme në ndërgjegjen morale të njerëzimit.
Papa Françesku ishte Papa i të varfërve, i të përjashtuarve, i të harruarve. Ai foli me zemër për padrejtësitë sociale, për krizën mjedisore, për nevojën e dialogut ndërfetar, për të drejtat e popujve dhe për paqen globale. Përveç se një lider shpirtëror i Kishës Katolike, ai ishte një udhëheqës moral për gjithë botën.
Në një kohë kur bota vuan nga polarizimi, urrejtja, luftërat dhe mungesa e empatisë, zëri i Papës Françesku ishte një dritë orientuese që ftonte për reflektim, bashkëjetesë dhe humanizëm. Ai na mësoi se forca e vërtetë qëndron në mëshirë dhe se feja nuk duhet të përjashtojë, por të përqafojë çdo njeri në dinjitetin e tij.
Edhe për shqiptarët, në veçanti për popullin e Kosovës, Papa Françesku ishte një figurë e respektuar thellësisht. Qëndrimet e tij për drejtësinë, për të drejtat e popujve dhe për dialogun pa imponim, u panë si sinjale të qarta të një Vatikani më të hapur dhe më të ndjeshëm ndaj dramave njerëzore të historisë sonë. Mbështetja nga selia e shenjtë, është adresa e bekimit të aleancës së përhershme të popullit shqiptarë me perëndimin – SHBA në veçanti.
Sot, ndërsa bota përkulet në lutje dhe nderim, kujtojmë jo vetëm Papën, por njeriun që jetoi me thjeshtësi dhe vdiq me dinjitet. Trashëgimia e tij nuk do të shuhet – ajo do të vazhdojë të frymëzojë breza të tërë në udhën e drejtësisë, dashurisë dhe paqes.
Pusho në paqe, Papa Françesku. Shpirti yt le të mbetet udhërrëfyes për një botë më të mirë.
