Ambasadori i Shteteve të Bashkuara të Amerikës, Jeffrey Hovenier ka njoftuar për përfundimin e diskutimit të mbajtur për Asociacionin e Komunave me shumicë serbe, në Ambasadën e ShBA-së në Prishtinë të martën.
Në një reagim në rrjetin social Twitter, Hovenier ka thënë se sot ka pritur si nikoqir një takim dëgjimor për Asociacionin.
Ai është shprehur mirënjohës ndaj palëve të interesuara për pjesëmarrje në takim, teksa ka bërë sërish thirrje për zbatimin e marrëveshje të arritura në dialogun Kosovë-Serbi, të lehtësuar nga Bashkimi Evropian.
“Sot mbajtëm një takim dëgjimor në Ambasadën e ShBA-së në Prishtinë për Asociacionin e Komunave me shumicë serbe. Mirënjohës ndaj palëve të ndryshme të interesuara për të qenë pranishëm për ndarjen e pikëpamjeve dhe ekspertizës së tyre. Ne vazhdojmë të avokojmë për zbatimin e të gjitha marrëveshjeve në dialog”, ka thënë ai.
