Pa Rrotlla mëson se është arrestuar Fatmir Sheholli. Ai aktualisht po merret në pyetje nga Policia e Kosovës. Motivet e arrestimit ende nuk janë bërë të ditura.
Ministri në detyrë i Punëve të Brendshme, Xhelal Sveçla, ka bërë me dije se i njëjti është arrestuar nën dyshimet e bazuara për përfshirje në spiunazh.
Në profilin e tij në “Facebook”, ai ka shkruar se aksioni për arrestimin e Shehollit është bërë në bashkëpunim të ngushtë me AKI-në dhe prokurorinë.
“Policia e Kosovës në bashkëpunim të ngushtë me AKI-në dhe prokurorinë ka arrestuar sot Fatmir Shehollin, me dyshimet e bazuara për përfshirje në spiunazh. Pres trajtim institucional me seriozitet të lartë të këtij rasti, i cili përbën një nga aktet më të rënda ndaj sigurisë dhe rendit kushtetues të Republikës së Kosovës. Individë si ky që kanë pasur hapësira mediatike të pakufizuara në vendin tonë ka bashkëpunuar me akterë që çdo ditë punojnë e veprojnë për të minuar Republikën tonë dhe progresin e saj. Mbesim të përkushtuar të mbrojmë vendin tonë nga të gjitha qarqet që nuk hezitojnë ta rrezikojnë atë për çfarëdo përfitimi të tyre. Koha e spiunëve të Serbisë në Kosovë ka përfunduar. Kushdo që punon për Serbinë e kundër Kosovës do të ndiqet pa kompromis e pandalshëm. Republika duhet mbrojtur me përgjegjësinë më të lartë institucionale dhe morale”, ka shkruar ai.
