Ish-kryetar i Komunës së Ferizajt, Adem Salihaj, njoftoi se ka dhënë dorëheqje nga LDK-ja.
Ai bëri të ditur se 18 vjet ka qenë në krye të LDK-së, dega në Ferizaj.
“Kam punuar së bashku me ju për një periudhë shumë të gjatë kohore. Po bëhen 32 vite, që nga themelimi i LDK-së – dega në Ferizaj. Me disa prej jush jemi bashkë që nga themelimi i saj, me disa të tjerë pak më vonë, kurse me disa të rinj jemi bashkë në vitet e fundit. Gjithmonë kemi punuar me përkushtim deri në sakrificë për idealet tona rugoviane të lirisë dhe pavarësisë së Kosovës. Kemi punuar njëkohësisht, për ndërtimin e institucioneve tona demokratike e të pavarura të Republikës së Kosovës në periudhën e paraluftës”, tha ai.
Ai ishte emëruar zëvendëskryeministër i parë dhe i vetmi deri atëherë i Qeverisë së Kosovës në mandatin 2004-2006.
Mes tjerash, ai ishte edhe deputet i Kuvendit të Kosovës si dhe anëtar i kryesisë së LDK-së.
Megjithatë, Salilaj tregoi se tash e tutje do t’i përkushtohet familjes dhe shkrimeve.
“Të dashur veprimtarë, sot kemi ardhur në një moment kur unë dua ta përfundoj periudhën e angazhimit partiak dhe të marrin përgjegjësi gjeneratat e reja, ta vazhdojnë punën dhe aktivitetin në LDK. Shpresoj se do të gjenden njerëz që do ta vazhdojnë vizionin rugovian dhe frymën e lirisë, pavarësisë dhe demokracisë, tri shtyllat kryesore dhe tri vlerat më të mëdha të partisë sonë, të vendosura nga Presidenti Rugova”, shkroi ai në Facebook.
