Në një masakër të rëndë në Cetinje janë vrarë 12 persona, përfshirë dy fëmijë, ndërsa për jetën e katër qytetarëve të Cetinjes po luftojnë mjekët e Qendrës Klinike në Podgoricë.
Në këtë ngjarje tragjike janë vrarë shtatë burra, tre gra dhe dy fëmijë.
Të gjitha njësitë policore, përfshirë Njësinë Speciale të Policisë, kanë kërkuar për orë të tëra të dyshuarin, Aco Martinoviq, i cili vdiq disa minuta para mesnatës pasi qëlloi veten në kokë. Sipas drejtorit të përkohshëm të policisë, Lazar Shçepanoviq, Martinoviq u rrethua nga policia pranë shtëpisë së tij në lagjen Humci.
Katër të plagosurit janë operuar mbrëmë në Qendrën Klinike. Drejtori i këtij institucioni, Dr. Aleksandar Radoviq, njoftoi se tre të plagosur rëndë janë në njësinë e kujdesit intensiv. Megjithëse gjendja e tyre është serioze, parametrat e tyre jetësorë janë aktualisht stabilë.
Operacioni për të katërtin, i cili ka plagë të shumta në kokë, bark dhe gjoks, sipas Dr. Radoviq, pritet të zgjasë deri në orët e para të mëngjesit.
Rreth orës 20:00, policia mori informacion se Martinoviq ishte parë në një nga depot e braktisura të ish-fabrikës “Obod”, por pas kontrollit të objektit, nuk u gjet atje.
