Erion Veliaj është shkarkuar nga posti i kreut të Bashkisë Tiranë edhe nga Këshilli i Ministrave. Veliaj e mbante detyrën e kryebashkiakut që nga viti 2015.
Që nga 10 shkurti, Veliaj mungon fizikisht në bashki pasi ndodhet në paraburgimin e Durrësit. Sapo vendimi të hyjë në fuqi, Veliaj mund ta ankimojë në Gjykatë Kushtetuese. Sipas Kushtetutës, Veliaj mund ta ankimojë brenda 15 ditëve, ndërsa kryeministri Rama njofton vakancën te Presidenti i Republikës dhe duhet të presë deri kur të përfundojë afati i ankimimit. Ndërkohë SPAK ka përfunduar hetimet dhe ka dërguar për gjykim në Gjykatën e Posaçme të Shkallës së Parë dosjen e kryebashkiakut Erion Veliaj. Në dosjen e kopsitur nga SPAK 13 akuza rëndojnë mbi Veliajn dhe 12 akuza rëndojnë mbi bashkëshorten e tij, Ajola Xoxa. Në përfundim të hetimeve paraprake, ka rezultuar se Veliaj dhe Xoxa, në bashkëpunim mes tyre, në 9 raste të veçanta, kanë marrë përfitime të parregullta në formën e shumave monetare dhe pasurive të paluajtshme, nga subjekte tregtarë dhe organizata jofitimprurëse, të cilët nga ana e tyre kanë marrë leje ndërtimi dhe përfituar fonde publike nga Bashkia Tiranë.
