Koalicioni VLEN ka akuzuar kryetarin e BDI-së, Ali Ahmeti, si përgjegjës kryesor për futjen e bankave të regjimit serb në Maqedoninë e Veriut. Sipas VLEN, Ali Ahmeti ka shndërruar pushtetin politik në mjet për përfitime personale dhe familjare, duke tradhtuar interesat kombëtare të shqiptarëve.
“Pas fasadës së patriotizmit të BDI-së fshihet vetëm para, krim dhe ndikimi i ‘Botës Serbe’. Ali Ahmeti dhe familja e tij po shesin pasuri strategjike bankare te banka të regjimit të Aleksandar Vuçiqit, ndërsa qytetarëve u premtonin themelimin e një banke shqiptare,” thekson VLEN. Si provë konkrete, VLEN përmend kompaninë “AS Senjak” nga Kërçova, e cila kontrollohej nga mik i ngushtë i Ali Ahmetit – babai i gruas së djalit të tij – dhe që posedonte mijëra aksione në Stopanska Banka – Manastir. Këto aksione u shiten më 17 shtator 2025 te Alta Banka në Beograd, në pronësi të Davor Macura, bashkëpunëtor i afërt i Vuçiqit dhe pjesë e rrjetit financiar të regjimit serb. “Ky nuk është një transaksion i rastësishëm.
Kjo është lidhje direkte financiare e Ali Ahmetit me regjimin serb. Ai nuk është vetëm partner politik me strukturat serbe ai është pjesë aktive e rrjetit të tyre financiar në Maqedoni. Me këtë, Ali Ahmeti shndërrohet në kërcënim të drejtpërdrejtë për pavarësinë ekonomike dhe stabilitetin financiar të shtetit,” thekson VLEN. VLEN akuzon se BDI, për 20 vjet, ka manipuluar shqiptarët duke folur për patriotizëm, ndërkohë që pas perdes shet kapital tek regjimet serbe. “Ali Ahmeti e kthen Maqedoninë në varësi të Beogradit dhe shqiptarët në varësi të qendrës serbe. BDI nuk është parti që mbron interesat shqiptare – është firmë private për pastrim parash, korrupsion dhe pasurim personal,” përfundon VLEN. VLEN ka paralajmëruar se provat do t’i paraqesë edhe organet e shtetit, duke nënvizuar se kjo është vetëm një pjesë e vogël e aferës dhe lidhjeve të Ali Ahmetit me strukturat antishqiptare në rajon.
