Presidenti i Serbisë, Aleksandar Vuçiç, është detyruar të ndërpresë papritur vizitën e tij në Shtetet e Bashkuara të Amerikës për shkak të një përkeqësimi të gjendjes shëndetësore, raportojnë mediat pro-qeveritare serbe dhe agjencia shtetërore Tanjug.
Sipas këtyre burimeve, Vuçiç është ndjerë keq në orët e pasdites, sipas kohës lokale në SHBA, dhe ka kërkuar ndihmë mjekësore para se të marrë vendimin për t’u kthyer menjëherë në Beograd. Ndërkohë që zyra e presidentit ende nuk ka dalë me një njoftim zyrtar për gjendjen e tij, mungesa e informacionit në faqen zyrtare të Presidencës ka nxitur spekulime të shumta, përfshirë natyrën e vërtetë të sëmundjes dhe arsyet e vërteta të kthimit të parakohshëm.
Burime të afërta bëjnë të ditur se presidenti Vuçiç ndodhej në SHBA për të marrë pjesë në disa ngjarje diplomatike dhe kishte planifikuar një takim të rëndësishëm me presidentin amerikan Donald Trump.
Takimi mes dy liderëve pritej të përqendrohej në çështje të sigurisë rajonale, marrëdhëniet dypalëshe dhe pozicionin e Serbisë në arenën ndërkombëtare. Gjendja shëndetësore e papritur ka bërë që Vuçiç të anulojë pjesëmarrjen në ngjarjet kryesore për të cilat kishte udhëtuar drejt SHBA-së.
Në momentin e incidentit, sipas raportimeve, në dhomën ku ndodhej Vuçiç ishin edhe ministri i Financave, Siniša Mali, dhe këshilltarja për media, Suzana Vasiljeviç. Mbetet e paqartë nëse kjo situatë do të ndikojë edhe në agjendën e tij të paralajmëruar ndërkombëtare, përfshirë udhëtimin e shumëdebatuar në Moskë më 9 maj për të marrë pjesë në Paradën e Fitores, një vizitë që ka shkaktuar shqetësim në Bruksel dhe kritika të forta nga Bashkimi Evropian. Zyrtarë të BE-së kanë paralajmëruar se një gjest i tillë do të vështirësonte rrugën e Serbisë drejt integrimit evropian.
Gjatë qëndrimit të shkurtër në SHBA, Vuçiç kishte komentuar për protestat studentore në Serbi, duke i quajtur “një imazh të trishtueshëm të një epoke të kaluar” dhe kishte shprehur pakënaqësinë e tij ndaj qëndrimit të BE-së, duke deklaruar se “obsesioni i tyre është largimi im për në Moskë”. Në ditët në vijim pritet një deklaratë zyrtare nga zyra e presidentit lidhur me gjendjen shëndetësore të Vuçiçit dhe zhvillimet e mëtejshme në kalendarin e tij diplomatik.
