Presidenti i SHBA-ve, Donald Trump, ka mbërritur në Izrael për një vizitë katër-orëshe.
Donald Trump ka mbërritur në Tel Aviv.
Në aeroportin Ben Gurion, presidenti amerikan u prit nga presidenti izraelit Isaac Herzog dhe kryeministri Benjamin Netanyahu, të shoqëruar nga gratë e tyre.
Gjithashtu në aeroport ishin i dërguari i Shtëpisë së Bardhë Steve Witkoff, vajza Ivanka Trump dhe dhëndri Kared Kushner, i cili të shtunën kishte folur me mijëra izraelitë të mbledhur në Sheshin e Pengjeve të Tel Avivit për të festuar pjesën e parë të marrëveshjes me Hamasin.
Hamasi ka liruar shtatë pengje izraelite, duke ia dorëzuar ata për transport Kryqit të Kuq – të parët që lirohen si pjesë e marrëveshjes së armëpushimit, sipas një raportimi të Associated Press.
Kanali arab Al-Arabi raporton se Hamasi do të lirojë së shpejti 13 pengjet e mbetura të gjalla, duke mos lënë asnjë peng izraelit në duart e tij.
Një zyrtar i përfshirë në operacion tha se të gjithë 1 mijë e 966 të burgosurit e liruar nga burgjet izraelite kanë hipur në autobusë duke pritur lirimin e tyre, raporton Times of Israel.
Midis të burgosurve janë 250 të dyshuar të dënuar për terrorizëm të cilët pritet të lirohen nga Burgu Ofer në Bregun Perëndimor, megjithëse me sa duket vetëm pasi Hamasi të ketë dorëzuar pengjet e mbetura në Gaza.
Mediat arabe raportuan se ekipet e Gjysmëhënës së Kuqe Palestineze hynë në burg për të transferuar një të burgosur të sëmurë, i planifikuar për lirim sot.
1 mijë e 718 të burgosur të tjerë nga Gaza të arrestuar gjatë luftës do të lirohen dhe do të kthehen në Rrip nga Burgu Ketziot në Izraelin jugor.
Ata pritet të transportohen në Spitalin Nasser në Gazën jugore.
