Kreshnik Spahiu ka reaguar ashpër për mënyrën se si disa media shqiptare po trajtojnë lajmet rreth shëndetit të Fatos Nanos, duke shpallur dhe hequr lajmet e tij të vdekjes disa herë.
Në një postim të tij në Facebook, Spahiu e ka cilësuar këtë si një shenjë të krizës së etikës në gazetari.
“Gazetaria shqiptare ka arritur një nivel të tillë, që është më i ulët se tellallët e kohës së Zogut,” ka shkruar Spahiu. “Sot, 6 herë kanë lajmëruar vdekjen e Fatos Nanos dhe 6 herë e kanë hequr lajmin, vetëm për të fituar klikime. Mezi po presin të vdesë, që të marrin më shumë audiencë.”
Ai gjithashtu ka kritikuar gazetarët dhe mediat që nuk e respektojnë dinjitetin e individëve dhe e përdorin tragjedinë për të krijuar sensacion. Spahiu ka kujtuar se në të kaluarën, “tellallët” do të ishin ndëshkuar për shpifje dhe lajme të pavërteta, ndërsa sot media shpesh përdor këto taktika për të maksimizuar fitimet.
“Qenëria dhe gazetaria janë dy nofulla të së njëjtës gojë,” ka theksuar ai, duke shtuar se, pas gjithë këtij shfrytëzimi të lajmeve për klikime, shumë gazetarë ankohen për pavarësi dhe lirinë e fjalës, pa e kuptuar se në fakt, ato janë të kontrolluara dhe të varura nga interesat e grupeve të fuqishme.
Në fund, Spahiu ka thënë se ky është një fenomen që kërkon reflektim dhe vetëdijësim, për të kthyer gazetarët në shërbim të të vërtetës dhe jo të sensacionit.
