Volodymyr Zelensky ka emëruar sekretarin e Këshillit të Sigurisë dhe Mbrojtjes Kombëtare të Ukrainës, Rustem Umerov, për të udhëhequr bisedimet e ardhshme me SHBA-në.
“Umerov dhe pjesa tjetër e delegacionit ukrainas janë tashmë rrugës për në SHBA”, njoftoi Zelensky.
Zyrtari do të zëvendësojë Andrii Yermak, i cili më parë drejtoi bisedimet mbi planin e paqes të propozuar nga SHBA-të, por dha dorëheqjen dje.
Zelensky tha se delegacionet ukrainase dhe amerikane ishin planifikuar të “përcaktonin” rezultatet e negociatave në Gjenevë fundjavën e kaluar mbi planin e propozuar nga SHBA-të për t’i dhënë fund luftës së Rusisë.
Ndërkohë, i dërguari special i SHBA-së, Steve Witkoff, pritet në Moskë javën e ardhshme për të diskutuar luftën me zyrtarët rusë.
Kremlini tha dje se takimi do të zhvillohet “në gjysmën e parë të javës”.
