Korporata Energjetike e Kosovës ka dalë me një komunikatë duke thënë se të gjitha kapacitetet janë në shërbim të sigurisë energjetike, derisa shton se po operojnë me pesë njësi gjeneruese.
Sipas KEK’ut prodhimi ditor po arrin në 20,640 megavatë në orë.
“Korporata Energjetike e Kosovës (KEK Sh.A.) njofton opinionin publik se, me rënien e temperaturave që nga 19.12.2025, ka rritur në maksimum angazhimin operacional, duke operuar aktualisht me pesë (5) njësi gjeneruese. Si rezultat, prodhimi ditor po arrin në 20,640 MWh, duke forcuar stabilitetin e furnizimit me energji elektrike dhe qëndrueshmërinë e sistemit elektroenergjetik të Republikës së Kosovës në një periudhë me kërkesë të rritur.”
“Në kushte normale, KEK operon me katër njësi gjeneruese, ndërsa një njësi mbahet si rezervë e nxehtë për nevoja teknike dhe mirëmbajtje periodike. Megjithatë, pavarësisht moshës së avancuar të stabilimenteve, falë angazhimit të jashtëzakonshëm të stafit teknik dhe përkushtimit të menaxhmentit, është bërë e mundur operimi me pesë njësi gjeneruese, me përjashtim të dy ndërhyrjeve të shkurtra teknike në një njësi.”
“KEK Sh.A. mbetet e përkushtuar të mbajë në operim sa më shumë kapacitete prodhuese të jetë e mundur, brenda kufijve të sigurisë teknike dhe stabilitetit operacional, për të garantuar prodhim të qëndrueshëm me energji elektrike.”
KEK bën thirrje për kursim të energjisë elektrike.
“Në këtë kontekst, siguria energjetike kërkon angazhim të përbashkët, ndaj ftojmë qytetarët që energjia elektrike të përdoret dhe të kursehet në mënyrë sa më racionale, veçanërisht në këtë periudhë me konsum të rritur.”
