Natyra Kuçi nga PSD ka thënë se Glauk Konjufca ka arritur që ta depolitizojë Kuvendin dhe në këtë kohë kur ka vlime politike, Kuvendi është jashtë skenës, raporton Gazeta Blic.
Përmes një postimi në Facebook, ajo ka thënë se i vetmi që po e kryen rolin e tij është Konjufca dhe ndërkohë që amortizon kundërshtarin duke e luajtur neutralin për disa tema, ai e ka detyrë të fundit zbutjen ose edhe tretjen e polarizimeve.
Ajo ka thënë se tkurrja e rolit të Kuvendit është në rrezik, derisa ka pyetur se a është ky zhvillim paralajmërim për koncentrimin e pushtetit te 1-shi.
Postimi i saj i plotë:
Glauk Konjufca ka arritur që ta depolitizojë Kuvendin. Në kohën kur ka vlime politike, Kuvendi është jashtë diskutimeve për to. Jashtë skenës. Aty nuk raportohet për dialogun, sepse konsiderohet që raportimet e mjaftueshme kanë ndodhur me liderët e partive. Kështu iu tha kryeministri. Por nuk është që edhe deputetët kërkojnë raportim, sipas rendit e procedurave.
I vetmi që po e kryen rolin e tij është Konjufca. Në ndërkohë që amortizon kundërshtarin duke e luajtur neutralin për disa tema, ai e ka detyrë të fundit zbutjen ose edhe tretjen e polarizimeve.
Tkurrja e rolit të Kuvendit është rrezik. Por a është ky zhvillim edhe paralajmërim për ndërrimin e formës së qeverisjes? Pra koncentrimi i pushtetit tek 1-shi?
